من ساعة ما مسك رئاسة نادى الزمالك وهو مش بيعمل أى حاجه غير أنه بيعمل مداخلات فى التليفونات بجميع البرامج وشغال هجوم على كل الرموز وعلى كل الناس ونسى أن فى حاجات أهم المفروض يشغل نفسه بيها وهى مشاكل النادى واللاعيبه .
ولكن هو كل اللى بيفكر فيه هو الغاء الهبوط ومحمود طاهر رئيس النادى الأهلى وكأن هما دول أهم حاجه فى الكون وأنه بقى رئيس لنادى الزمالك علشان يلغى الهبوط ويهاجم الناس .
لأ نقطة نظام ....... أنت جيت لرئاسة النادى علشان تحل مشاكل النادى وفى ناس كانت للأسف فاكره أنك هتجيب الديب من ديله بس للأسف أنت كل همك تعمل مداخلات فى البرامج وبس وكأن البرامج حالها هيقف لو أنت بطلت تعمل مداخلات فيها .
فين الصفقات السوبر اللى قلت عليها فين حقوق اللاعيبه فين القناه الخاصه بالنادى فين حاجات كتير ؟
فين البرنامج بتاع قيمتك اللى قلت عليه كل همك هو الكراسى والشماسى للأعضاء بتوع النادى اللى هما أعضاء الجمعيه العموميه اللى هما السبب فى نجاحك اللى كلنا عارفين أنهم أهلاويه .
وطبعآ عارفين هما ليه أختاروك وعلشان أيه علشان تكمل مسيرة الخراب اللى بدءت من ساعة ما دخلت النادى ساحات المحاكم أخرت النادى عشر سنين لورا .
حد قلك أن فريق كرة اليد مهدد بالهبوط اللى هو كان أفضل فريق كرة يد فى القاره الفريقيه وكان محقق أفضل النتائج فى الساحه العالميه ؟
طبعآ فى ناس هتقول أن مجلس عباس هو اللى دمر باقى الفرق تمام المفروض بقى أن فى رئيس جه يعدل المايل ولا أيه ؟
ولا الرئيس بتاعنا مش فاضى غير فى أهانة رموز نادى الزمالك زى حازم أمام بعد ما أعتذر عن لجنة الكره قام طلع فى البرامج وقال أنه مش أبن النادى ؟!!
حازم أبن حماده أمام حفيد يحى أمام مش أبن النادى ؟؟؟ أزاى مش عارفه وعايزه أفهمها ؟
حازم أمام اللى هو وعيلته قدمه للزمالك بطولات لا عدد لها ولا يمكن أن أى حد ينكرها .
طلعت علينا بعد ضياع حق الزمالك فى مباراة بتروجيت والأسماعيلى وقلت أحترم قرار لجنة المسابقات بالرغم أن ده حقنا وسكت وتغاضيت عليه
منعت الجماهير علشان شتمو عامر حسين وأنت أصلآ شغال شتيمه فى كل خلق الله !!! " إذا كـــان ربُ البيتِ بالدفِ ضاربٌ فشيمـةٌ أهلِ البيتِ الرقصُ "
من يوم ما جيت رئيس لنادى الزمالك وهو حق الزمالك ضاع أكتر من الأول والأزمات زادت عن الأول ماشوفناش أى حاجه تجيب حق النادى .
طلعت علينا فى البرامج وقلت الحضرى بيحضر جن وعفاريت وسحر والكل أتريق علينا أزاى دى عقلية رئيس نادى الزمالك ؟!
نادى الزمالك نادى عريق وكبير ولازم تعرف أنك ماسك نادى أى حد يحلم أنه يعدى من جنبه وأن النادى محتاج رئيس يكون متفرغ لمشاكله مش للمداخلات التليفونيه والخناقات على الهوى وسب الناس علشان رفضو رأى ليك .
سيبك من ألغاء الهبوط وركز فى هبوط فريق كرة اليد ومشاكل النادى اللى محتاجه كل ثانيه من وقتك .
فى النهايه بتمنى أن النادى يخرج من أزماته وكل واحد ياخد حقه وبتمنى أنى أشوف قناة نادى الزمالك اللى كل زمالكوى بيحلم بيها وأن الزمالك يتوج ببطولة أفريقيا اللى هى كانت من البطولات المفضله لنادى الزمالك وبطولة الدورى اللى أحنا محرومين منها بقلنا كتير .
النادى محتاج رئيس يحل مشاكله مش رئيس يتكلم فى البرامج ويتكلم عن الجن والشعوذه .......
ايوة كدة اديلو مرتضى البذئ دة الفاسد
ردحذف