النهارده هتكلم معاكو عن أنتخابات نادى الزمالك اللى هى المفروض هتبدء بكره وطبعآ هتبقى ضرب نار كالعاده المرشحين على كرسى الرئاسه مرتضى منصور وكمال درويش ورؤوف جاسر طبعآ كاعادة أنتخابات نادى الزمالك خناقات وشتايم واهانات وتطاول وممكن كمان توصل للضرب والسب العلنى .
طبعآ مش كل المرشحين هو واحد بس كلنا عارفينه اللى دائم المشاكل مع أى حد وضد أى حد سواء ناجح أو مش ناجح وطبعآ كاالعاده الجمهور هو اللى بيدفع التمن من حرقة دم وأعصاب ده غير النادى والمشاكل اللى بيقع فيها المشكله بقى مش فى كل ده المشكله أن كل مرشح عينه على الكرسى وبس .
أه عينه على الكرسى يعنى محدش فيهم بيفكر أنه هيخدم النادى أو أنه المفروض الكرسى ده مش علشان يتمنظر بيه على خلق الله أو يعمل فيها أبن ناس وانه جاب الديب من ديله لما بقى رئيس لنادى الزمالك
المفروض أن اللى مرشحين نفسهم يبقو فاهمين وعارفين أن الزمالك محتاج أعادة بناء فى كل حاجه يعنى مش كراسى وشماسى وبس الزمالك محتاج اللى هو أكتر من كده فى ناس المفروض ماكانوش يرشحو نفسهم والمفروض أنه يختفو من على الوجود اصلآ لأن هما كانو سبب رئيسى فى الخراب اللى النادى فيه من دخول محاكم ومشاكل .
والمصيبه بقى الكبر أن فى أهلاويه داخلين على كرسى النائب واللى بقى يجنن " محمود معروف " أللى أنا مش عارفه هو بيشجع مين بالظبط هل هو أهلاوى ولا زمالكوى ؟ لغاية دلوقتى مش قادره أعرف وأيه اللى عمله للزمالك علشان يدخل ضمن قايمة مرتضى منصور على العموم كل شىء جايز فى قايمة مرتضى منصور .
مرتضى منصور مش عارفه أزاى فى ناس ممكن تختاره وللأسف فى ناس بتقول أنه رجل المرحله القادمه وأنه هو اللى هيجيب حق الزمالك وهيقف فى وش أى حد يتكلم علىالزمالك أكيد الناس دى ما حضرتوش لما كان رئيس النادى النادى أتهد على أيده فى شهرين بالعدد .
ووجع دماغنا بعمرو زكى اللى هو طول الوقت مصاب ودائم المشاكل فى الزمالك يعنى مرتضى ما جبش الديب من ديله ولا عمل حاجه تفيد النادى بالعكس ده أذى النادى بسبب أنه دخل النادى فى قضايا ومحاكم .
فى ناس مرشحه نفسها فى الأنتخابات محترمين جدآ وفى شباب كمان هايلين أتمنى أنهم ينجحو الكل فى ترقب ومنتظر النتيجه بكره كل واحد نفسه فى مرشح ينجح وينفذ أى حلم من حلم الجماهير بس لغاية دلوقتى كل اللى بيتكلم أو أغلبهم مش بيتكلمو غير على الكراسى والشماسى ؟!
طيب فين القناه الخاصه بتاعة النادى اللى بقلنا سنين بنسمع عنها ؟
فين الخطط المستقبليه للنادى ؟
فين الخطط لفريق الكره والتدعيم ليه ؟
طيب ليه محدش أتكلم عن ديون النادى هتتدفع أزاى وهتتجاب منين ؟
فين الأفكار ؟!
للأسف كل واحد عينه على الكرسى وبس ومحدش بيفكر غير فى أنه هيبقى رئيس النادى الزمالك وبس " برستيج " لا أكتر ولا أقل أنا عن نفسى وبقولها بكل صراحه ووضوح مش موافقه على أى حد من اللى نزلين على كرسى الرئاسه للنادى لأانهم وللأسف الشديد ما ينفعوش يبقو رؤساء لنادى الزمالك .
أكتر حاجه بقى هتجنن وأعرفها هى الأندماج الغريب المريب بين مرتضى منصور وكمال درويش هما مش دول برضه اللى كل واحد فيهم عمل كتاب عن التانى ؟
طيب أيه اللى حصل ؟ محدش يقولى أصل مصلحة الزمالك فوق المشاكل علشان مضحكش كانت فين مصلحة الزمالك دى وهو فى قواضى ومشاكل طيب الناس دى ليه ما حولتش تساعد النادى فى الأزمات اللى مر بيها ولا هما بس ظهرو ساعة الأنتخابات طيب اللى هينجح يا ترى هينفذ اللى وعد بيه ولون محدش أصلآ وعد بحاجه غير بالكراسى والشماسى بس كأن مثلآ كل حاجه كامله فى النادى ودول بس اللى ناقصين .
بكره كل شىء هينكشف ويبان يا أما ربنا يستر على الزمالك وماينجحش اللى فى بالى يا أما هنشوف أيام سوده
أن لناظره لقريب وبكره مش بعيد قريب جدآ .
بس يا ترى لو مرتضى نجح لا قدر الله هيبقى كويس وهيبطل يهين فى الناس وهينقذ الزمالك فعلآ من المشاكل اللى هو غرقان فيها ؟!
طيب لو حد فاز غير مرتضى يا ترى بقى مرتضى هيسيبه فى حاله ولا هيرفع عليه قضيه ويتهمه بالتزوير ؟!
أدينا مستنيين وهنشوف بكره أيه اللى هيحصل وبكره مش بعيد .
ليست هناك تعليقات:
إرسال تعليق